Tempo de rega. "A Sentenza"

Domingo Núñez mandou realizar unha copia da Sentenza para el e outra copia debería estar no Xulgado ou no Concello de Trives. Á copia, que na actualidade conserva Gregorio Núñez, fáltanlle as primeiras follas nas que aparece a primeira persoa con dereito á rega.

Para o reparto da auga distínguense catro zonas:

-Zona 1: Rega coa auga do Regueiro que  recolle nas presa do Real e da Ponticela. Correspóndelle a auga desde o luns ás 03:00 ata o mércores ás 15:14. Abarca as terras que están ao norte da carrúa que  vai aos Lameiros (O Real, A Ponticela, O Cereixedo, Vilaboa, O Picouto, A Canella, O Campairo, Casenando, ...). Regan 113 persoas.

-Zona 2: Rega coa auga do Regueiro, que  recolle nas presas do Pontón, Portovello e A Molariña. Correspóndelle a auga desde o mércores ás 15:14 ata o domingo ás 11:36. Abarca as terras que están ao sur da carrúa que vai aos Lameiros, agás as que tamén regan coa fonte da Quinta. Regan 114 persoas.

-Zona 3: Rega coa auga do Regueiro que  recolle na presa do Pontón e coa auga da fonte da Quinta. Correspóndelle a auga desde o domingo ás 11:36 ata o luns ás 03:00. Abarca as terras que regan coa fonte da Quinta. Regan 58 persoas.

-Zona 4: Rega só coa auga da fonte da Quinta. Correspóndelle a auga desde o luns ás 03:00 ata o domingo 11:36. Abarca as terras que regan coa fonte da Quinta. Regan 58 persoas.

O número de persoas con dereito á rega ascende a 150 (podería ser algunha máis se das sete persoas das que non hai datos, algunha tivera dereito á rega só na primeira zona). Destas persoas 105 son veciñas de Navea e o resto son de distintos lugares de Caldelas.

Os datos que se expoñen a continuación só se refiren á auga do Regueiro:

Ás persoas de fóra de Navea correspóndenlle 28 horas 23 minutos. De isto dedúcese, se o reparto foi equitativo, que o 17% das terras de regadío de Navea pertencían a xente de Caldelas. O resto do tempo repártese entre as persoas de Navea con terras.

O tempo asignado vai desde algunhas persoas que só dispoñen dun minuto ata quen ten máis de oito horas. Hai máis de corenta persoas que teñen asignado menos de dez minutos!